রেবা গোস্বামী:

আইয়া কিতা করলায় মাগো,
এ ধরা ধামো।
কত নশকার দুঃখতাপ লইয়া,
পড়ছি আমরা জ্যামো।

তুমি ওতো পাওনা কুন্তা,
আও খালি দোলায়।
দোলায় আইলে অসুখ বিসুখে পাইয়া,
দেশো মড়ক লাগি যায়।

যাইতায় আবার ঘোড়ায় বুঝি?
এ কোন সমাচার!
ঘোড়ায় গেলে ছত্রভঙ্গ হইয়া দেশো,
লাগে হাহাকার।

আও যে লইয়া ফুয়া ফুড়ি,
ধন,জন,বিদ্যা,সিদ্ধি দিতায় করি।
তে গি কও চাই কুন্তা না পাই,
আমরা কেনে মাইর করিয়া মরি?

লক্ষ্মী,সরাই,কার্তিক,গণেশ লগে,
আইন যুদি গো ধরাত।
আমরা কেনে হক্কল মন্তে,
থাকি খালি মরাত?

তোমার সরাই রে জিগাও-
আমরারে কিতা দিয়া যাইন?
মনুষ্যত্বহীন বিদ্যারে অখন,
হক্কলে কেনে গো ডরাইন?

বিদ্যা, বুদ্ধি,মনুষ্যত্ব,
এক না করি দিলে,
খালি পুথি পাস বিদ্যারে অখন,
ডরাইন হক্কলে।

লক্ষ্মী,কার্তিকে দেইন যুদি,
ধনে জনে ভরি।
নেয় গি কেনে অমানুষে,
চুরি, ডাকাতি করি?

গণশারে জিগাও-
সিদ্ধি লাভের আশা দিয়া,
লুকাইন কেনে চিপাত গিয়া?
কও কি আশায় আইজ থাকি বুক বান্দিয়া।

আইলায় মাগো তাড়াতাড়ি,
লইয়া, রণ রঙিণী বেশ।
অসুর দমন করো আইয়া।
নাইলে এ ধরণী শেষ।

কাম,ক্রোধ,লোভ হরণ করো,
আইয়া গো আমরার।
অমনেই আমরা হিংসা নিন্দার,
সুকৌশলী ড্রাইভার।

ক্ষমা করি দিও মাগো,
প্রনাম জানাই আমি।
জানো অইত্ত হক্কলতা মা
তুমি অন্তর্যামী।

সিলেট ২৪ বাংলা/এসডি.